Veikindi veikindi

Ég eyddi hálfri síðustu viku heima með son minn lasinn. Greyið fékk svo kallaða barkabólgu/krúpp, sem lýsir sér þannig að öndunarvegurinn þrengist þegar hann fær hóstakast og á erfitt með öndun. Það heyrist einnig mjög einkennandi hljóð þegar hóstað er, en það er eins hljóðið sem selir gera. Dagsatt. 

Það sem er magnað er að það virkar vel á einkennin að hlaupa með börn út í kalt loft. Hann varð alltaf verstur þegar hann var farinn að sofa og eyddum við því nokkrum kvöldum í hlaupa með hann út í frostið, í snjógalla og vafinn inn í sæng. Þar sátum við svo þar til að okkur fannst honum líða betur. 

Það er alveg ótrúlega óhuggulegt að horfa á barnið sitt berjast við að ná andanum. 

Á svona stundum er ég þakklát fyrir að búa með lækni.

Hann jafnaði sig svo og var feginn að komast í leikskólann þessi elska.

Eins og ég hafði minnst á í síðustu færslu þá fórum við á skíði síðustu helgi. 

Við vorum varla komin heim þegar að dóttir mín varð veik. 

Svona er þetta, þau taka við af hvort öðru.

Hún er búin að vera heima alla þessa viku með hita og kvef. 

Ég vona að hún verði nógu frísk til þess að fara í leikskólann á morgun. Þó að hún sé alltaf mjög glöð á morgnana að þurfa ekki að fara í leikskólann og fá að vera heima með mömmu, þá líða kannski tveir tímar og hún er orðin eirðarlaus. 

Við erum að sjálfsögðu búnar að dunda okkur við ýmislegt, lita, púsla, horfa á teiknimyndir og fara í ýmsa leiki. 

Í dag erum við búnar að baka hrökkbrauð og hafa það notalegt. Henni finnst samt mjög ósanngjarnt að geta ekki farið með mér eitthvað út, þá helst í ræktina eða búðina.

Það tekur á alla að vera svona mikið inni svo ég vona að þessum veikindum fari að ljúka. Þau eru reyndar búin að vera mjög hraust í allan vetur svo að það hlaut að koma að þessu. Ég hef ekki yfir miklu að kvarta.

Það sem er þó jákvætt við þetta allt saman er að þau fá að eyða svolítlum tíma í sundur. Þar sem að þau eru tvíburar eru þau mjög háð hvort öðru og hafa einhvers konar tengingu sem ég mun aldrei skilja. Sem er yndislegt.

En það er líka mjög gott fyrir þau að vera í sitt hvoru lagi og njóta sín. 

Það hefur ekki verið neitt vandamál í þessari veikindatörn og þau alltaf jafn glöð að sjá hvort annað í lok dags.

Ég læt fylgja með eina mynd af þeim þar sem hún var með "klullur" eins og mamma og hann með vax eins og pabbi. 

brynja-g

Helgin

Um helgina fórum við fjölskyldan í fyrsta skiptið á skíði síðan tvíbökurnar fæddust. Það var ekkert smá skemmtilegt að sjá börnin sín á skíðum. 

Þau voru alveg ótrúlega dugleg og foreldrarnir að springa úr stolti.

Það sem er svo skemmtilegt við að búa í svona stórri borg er að hafa fjölbreytta afþreyingu í boði. 

Hér eru nokkur skíðasvæði (misdýr) sem hægt er að velja úr. 

Nú ætlum við að reyna að fara um hverja helgi til þess að æfa krakkana betur.

Bóndadagurinn var ljúfur hjá okkur. Bóndinn á heimilinu fékk pakka, góðan mat og dekur í tilefni dagsins. Ég sá svo svolítið sniðuga setningu á einni bóndadagskökunni á Íslandi. 

Þar stóð; Bóndadagur í 1 dag, svo koma 364 konudagar. 

Mér fannst þetta frekar fyndið.

Á laugardagskvöldið fengum við góða vini til okkar í mat og spil. 

Við höfum mjög gaman að því að spila og höfum prufað hin ýmsu spil. 

Við prufuðum nýtt spil sem heitir Escape: The curse of the Temple, sem ég mæli hiklaust með. 

Spilið snýst um að komast út úr svo kölluðu musteri áður en að tíminn rennur út og musterið hrynur. 

Spilið veitir að sjálfsögðu nokkrar áskoranir sem maður verður að komast í gegnum og maður getur einnig dregið spil sem að geta komið manni til hjálpar.

Það fylgir geisladiskur með spilinu með lagi sem maður verður að spila á meðan, sem að gerir þetta ennþá meira stressandi og ég get fullyrt það að hjartslátturinn fer upp úr öllu valdi oftar en einu sinn þegar spilið er spilað.

Spilið er fyrir 8 ára og eldri og hentar því vel fyrir fjölskyldur sem finnst gaman að spila saman.

Annað jákvætt við það, er að hvert spil tekur aðeins 10 mínútur og hentar það því mjög vel þeim sem hafa ekki eirð í sér að sitja lengi við flókin spil. 

Við spiluðum spilið að minnsta kosti fimm sinnum á föstudaginn, ef ekki oftar.

brynja-g

Halló rútína

Nú eru jólin senn á enda og daglega rútínan að byrja. Mikið er ég fegin. Það er alltaf jafn yndislegt að njóta jólanna en alveg ofboðslega gott að komast aftur í sína venjulega rútínu. 

Við höfðum það alveg frábært með foreldrum mínum hér yfir jólin og nutum svo áramótanna með vinum okkar.

Krakkarnir byrjuðu á leikskólanum í gær og höfðu ekkert smá gott af því. Þau eru voðalega glöð að hitta alla krakkana aftur og einnig "fröknarna". Á leikskólum hér í Svíþjóð eru nefnilega konurnar sem vinna á leikskólunum kallaðar "fröken". 

Mér finnst það voðalega krúttlegt. 

Ég hef reyndar ekki velt því fyrir mér hvað strákarnir eru kallaðir. Það er enginn strákur að vinna á þeirra deild, en kannski herra?

Ég ætti að komast að því.

Framundan hjá okkur er því skóli, leikskóli, vinna og almenn, venjuleg rútína. 

Nýtt ár framundan og ný markmið. Eða bara sömu markmið og hafa verið því að það er alltaf hægt að bæta sig á öllum sviðum, ekki satt?

2014 er mjög spennandi ár og felur í sér brúðkaup og barneignir vina, ferðalög, fermingar og fleira skemmtilegt.

Vona að þið hafið haft það gott yfir jólin og séuð tilbúin að komast í ykkar rútínu.

brynja-g

Gleðilega Luciu!

Í dag halda Svíar upp á Santa Lucia. Í dag fer ég í síðasta prófið mitt fyrir jól. 

Mikið sem það verður gott að ljúka því af. 

Börnin mín bestu fá að halda Luciu fögnuð í leikskólanum. Þar klæða þau sig upp sem Santa Lucia og Piparkökustrákur og syngja Luciu lagið. Eftir þessa athöfn er svo jólakaffi fyrir foreldrana.

Fögnuðurinn hefst kl. 15 og prófið mitt byrjar á sama tíma. Ég er mjög svekkt yfir að geta ekki tekið þátt í þessu með þeim en stundum verður maður að fórna ýmsu í þágu einhvers annars.

Billi kemst sem betur fer og getur tekið þetta allt saman upp fyrir mig.

Piparkökustrákurinn minn og Lucian mín.

Jæja, best að klára að fara yfir efnið.

Eigið góðan föstudag. Loksins komin helgi.

brynja-g 

Stekkjastaur kom fyrstur....

Mikið sem við áttum góða daga með tengdaforeldrum mínum. Börnin gjörsamlega nutu sín í botn og þau eru klárlega heppnust í heimi með ömmu og afa. 

Fyrst ég er á þeim nótunum verð ég að segja að ég er líka heppnust í heimi með tengdaforeldra. Anna og Billi eru með þeim bestu manneskjum sem ég hef á ævinni kynnst og ég er óendanlega þakklát fyrir að eiga þau að. Það er sko ekki sjálfsagt að eiga svona mikið af góðu fólki í kringum sig. 

Takk aftur fyrir samveruna.

Tölfræði/aðferðarfræði prófið er afstaðið og nú tekur við næsta og síðasta prófið (á árinu). Taugasálfræðin góða. Svo eru reyndar tvö próf í janúar líka og þá er önninni lokið. 

Þetta er svolítið öðruvísi uppbyggt hérna úti eins og ég hef áður talað um. Svo að þessi önn klárast í rauninni ekki fyrr en um miðjan janúar. Öðruvísi, en ágætt.

Snjórinn er allur farinn hjá okkur, mér til mikils ama. Ég bið og vona að við fáum að minnsta kosti hvít jól. Í fyrra var allt á kafi á þessum tíma og hafði verið það í nokkrar vikur. Það kyngdi niður snjónum nánast á hverjum degi og það var svo ótrúlega jólalegt. Það eru ennþá smá séns að hann komi.

Í kvöld kemur svo fyrsti jólasveinninn, Stekkjastaur. Við erum svo heppin að þrátt fyrir að við búum í Svíþjóð þá finna jólasveinarnir alla íslensku krakkana. 

Tvíeykið er mjög spennt fyrir þessu öllu saman. 

Það verður spennandi að sjá hvað Stekkjastaur kemur með.

Að lokum langar mig að deila með ykkur að mig langar rosalega í þessa peysu úr Gina Tricot.

Eins og margir vita þá elska ég jú blúndur og ljósan lit. 

Þessi er nú heldur betur í takt við það.

Kannski les jólasveinninn bloggið mitt.

brynja-g

"Our children are the future"

Akkurat á þessu augnabliki sit ég í klínískum sálfræðitíma við Stocholms Universitet. Þetta eru mjög áhugaverðir tímar og skemmtilegt að sitja í þeim...svona oftast.

Í dag höfum við mikið talað um meðferð. Það er að segja, viðtalsmeðferð sem fer fram hjá sálfræðingum. Mér finnst erfitt að ímynda mér hvað ég vil gera þegar ég klára þessa menntun.

Ég er ekki viss um að ég hafi áhuga á því að sitja allan daginn og hlusta á fólk skýra frá vandamálum sínum og hjálpa því að leysa þau.

Það er mikilvægt starf, en ég er ekki viss um að ég vilji vinna við það alla mína ævi.

Mitt aðaláhugasvið í náminu hefur hingað til verið börn. Þroskasálfræði og allt sem kemur henni við. 

Mér finnst það einstaklega áhugavert og gaman að hugsa hvernig foreldrar/forráðamenn geta alið börnin sín vel upp og mótað heilsteypta og hamingjusama einstaklinga sem eru tilbúnir að fara út í samfélagið. 

Það er auðvitað mikið og vandasamt verk. En það er líka eins og með svo margt annað, ekki eitthvað sem er hægt að læra einn, tveir og þrír heldur lærir fólk mikið af reynslunni. 

Það er áhugavert að steypa sér í vangaveltur um hvernig viðbrögð og hegðun foreldra/forráðamanna geta skipt sköpum fyrir barnið seinna á lífsleiðinni. 

Uppeldisaðferðir hafa í gegnum tíðina verið jafn misjafnar og þær eru margar. Mér finnst til að mynda hrikalegt að hugsa til þess að einu sinni hafi það verið "normið" að láta börn gráta sig í svefn, að það verði að líða x langur tími á milli brjóstagjafa og barnið verði bara að bíða þess á milli. 

Það er óhuggulegt að hugsa til þess að það hafi einnig verið "normið" að beita líkamsrefsingum og að börn hafi ekki verið talin "alvöru" einstaklingar þar til að þau náðu ákveðnum aldri og þar af leiðandi komið fram við þau eins og þeirra tilfinningar og álit skiptu engu máli.

En þetta er sem betur fer breytt í dag og ég neita að trúa því að þetta verði einhvern tíman aftur "normið".

Ég vona að þroskasálfræðingar muni halda áfram að komast að hinu og þessu sem getur bætt uppeldi barna til hins betra. 

Það er nefnilega svo rétt hjá hinum forna Aristotle og henni Whitney Houston heitinni, að börnin okkar eru framtíðin.

Í hraða nútímasamfélags er allt of algengt að foreldrar telji sig ekki hafa tíma fyrir börnin sín og láti það í hendur einhverra annarra að hugsa um þau. Ef fólk ákveður á annað borð að eignast börn er svo mikilvægt að gefa sér tíma í að sinna þeim eftir bestu getu því þessi tími kemur aldrei aftur.

Hlúið vel að börnunum ykkar og gefið þeim allan þann tíma sem þau þurfa á að halda frá ykkur.

Knúsið þau extra mikið í kvöld.

brynja-g

Heimsóknir og jólaskap

Þessa dagana erum við sænska fjölskyldan með heimsókn. Við vorum svo heppin að fá Billa afa og Önnu ömmu til okkar.

Það er svo ótrúlega dýrmætt að fá fólkið sitt til sín. Börnin njóta sín í botn og eiga í engum erfiðleikum með að plata ömmu og afa í að dekra þau. Við foreldrarnir erum algjörlega í öðru sæti þessa dagana en það er líka bara í fínasta lagi. Mér finnst svo mikilvægt að þau nái að tengjast ömmum og öfum vel þrátt fyrir að við búum erlendis. Það er gott að hafa fleiri fyrirmyndir í lífinu en foreldra sína. 

Svo verðum við svo heppin að fá ömmu Guðrúnu og afa Gumma yfir jólin, mikið verður það notalegt.

Annars er mig farið að langa í snjó! Ég skoða myndirnar frá Íslandi og snjónum þar og lít svo út um gluggann á auðar göturnar. Mér finnst alveg vera kominn tími til þess að fá hvíta jörð og jólastemmningu.

Á sunnudaginn sl. fórum við einmitt á jólamarkað og svo hrikalega fínt jólahlaðborð. Það var ótrúlega gaman að fá smá jólaanda. Við erum að sjálfsögðu búin að skreyta hjá okkur en það er alltaf extra skemmtilegt að gera eitthvað svona öðruvísi jólalegt. 

Það vantaði bara snjóinn.

Hann fer vonandi að láta sjá sig, að minnsta kosti fyrir jól vona ég.

brynja-g

Helgin sem leið...

Síðasta helgi var alveg dásamleg. 

Föstudagskvöld eru mín uppáhalds kvöld. Þá bökum við alltaf pizzu með krökkunum. Þau borða sína pizzu fyrst en við foreldrarnir eigum notalega stund með okkar pizzu og rauðvín þegar þau eru sofnuð. Oftar en ekki eyðum við svo kvöldinu í að horfa á þættina okkar með smá nammi í skál. Það er dásamlegt.

Á laugardeginum áttum við börnin svo ljúfa stund með góðum vinum. Við fórum á róló og bökuðum vöfflur og kanilsnúða. Billi var því miður að vinna og gat ekki notið með okkur að þessu sinni.

Eins og ég hafði nefnt áður hélt Mardís upp á afmælið sitt á laugardaginn og það var alveg frábært að fara til hennar. Veglegar veitingar og góður félagsskapur, klikkar ekki.

Sunnudagurinn var svo alveg fullkominn sunnudagur. Við fjölskyldan hittum vini okkar og saman fórum við í hrikalega flottan brunch á Södermalm. Við sátum þar í tæpa þrjá tíma og borðuðum á okkur gat. 

Þetta var hlaðborð svo að það var eins gott að nýta það!

Eftir þetta mikla át langaði okkur mest til þess að leggjast upp í rúm og sofna en við ákváðum að nýta fallega haustveðrið og fengum okkur langan göngutúr um Stokkhólm. 

Þessi borg er án efa fallegasta borg sem ég hef komið til. Hún býr yfir svo miklum sjarma og hefur svo fallegar byggingar. Þvílík forréttindi að fá að búa hérna. Borgin býður upp á mikið skal ég ykkur segja.

Ég mæli eindregið með því að heimsækja hana ef að þið hafið ekki nú þegar gert það.

brynja-g

Helgin á enda

Takk kærlega allir fyrir að sýna síðasta innleggi mínu svona mikinn áhuga!

Mér þykir ekkert smá vænt um það. 

Helgin er búin að vera ósköp ljúf. Í fyrsta sinn í nokkrar vikur hafa allir fjölskyldumeðlimir verið í fríi bæði laugardag og sunnudag. 

Það er svo notalegt þegar við eigum helgina saman.

Á föstudagskvöldið fórum við í mat til yndislegra vina. Þau báru fram þvílíka veislu handa okkur. Við fengum hörpuskel í forrétt og lamb í aðalrétt. Það er ekki að spurja að hæfileikunum í eldhúsinu á þeim bænum!

Ég kom svo með eftirréttinn og í þetta sinn gerði ég möndlustykki úr fyrstu bókinni hennar Berglindar Sigmarsdóttur, 

Heilsuréttir Fjölskyldunnar. 

Þessi möndlustykki eru algjört nammi!

Ég notaði að vísu ekki möndlusmjör heldur hnetusmjör í staðinn þar sem að það er aðeins ódýrara.

Hrikalega gott!

Í gær var okkur svo boðið í 2ja ára afmæli hjá Sóllilju og það þarf nú ekki að taka það fram að það var alveg frábært.

Við fengum æðislega súpu og auðvitað nóg af kökum! Enda lágum við afvelta í sófanum í allt gærkvöld eftir át dagsins.

Í dag byrjuðum við daginn á hollum og góðum brunch og eyddum svo deginum í Gamla Stan, gamla bænum hér í Stokkhólmi. Þar er yndislegt að rölta um þröngu göturnar og skoða litlu búðirnar. Þetta minnir mann aðeins á Ítalíu. Þröngar litlar götur lagðar pínulitlum hellum, ótrúlega kósý. Við fjölskyldan enduðum daginn sem vafinn var Ítölsku þema á Vapiano þar sem við gæddum okkur á pizzum og pasta, alltaf gott.

Ég vona að þið hafið átt ljúfa helgi og óska ykkur góðs sunnudagskvölds.

brynja-g

Sumarsæla og próflestur

Nú er sumarið að lauma sér að í Stokkhólmi, loksins!

Við erum búin að bíða lengi eftir að fá smá sólskin og hlýtt andrúmsloft. 

Veðrið hérna þessa dagana er mjög gott, sól og í kringum 13-15 stiga hiti. Við kvörtum ekki yfir því!

Ég fæ nú reyndar ekki mikið að njóta þess þar sem að ég sit í próflestri bróðurpart úr deginum. En það er svo sem stutt þar til að prófin klárast og þá get ég byrjað að njóta.

Annars fékk ég frábærar fréttir í vikunni, ég komst inn í skiptinám hérna í Stockholms Universitet. Ég byrja þar í haust og fæ að vera tvær annir, eða heilt skólaár. Það er hrikalega spennandi. 

Ég hlakka alveg rosalega til þess að fara að fara út á meðal fólks aftur (eitthvað annað en að skutla og sækja í leikskólann og kaupa inn). 

Þó að það séu vissulega margir kostir við að vera í fjarnámi og ég er mjög þakklát fyrir að hafa getað það, þá eru kostirnir við hitt bara svo miklu meiri. Það þarf alveg ákveðnar týpur af manneskjum sem að njóta þess að vera heima....alltaf. Ég er bara ekki ein af þeim. Ég þarf eitthvað félagslegt umhverfi þar sem að ég á í félagslegum samskiptum dags daglega við fólk eldra en þriggja ára. Jú og makann minn. Þó að þú sért alveg hrikalega skemmtilegur Billi minn. Það verður gott að breyta aðeins til.

Ég hlakka til að fara úr því að vera flíspeysumamma yfir í mig sjálfa aftur!

YFIR Í

...OK,  öfgar í báðar áttir en þið skiljið hvað ég er að fara!

Það er bara þannig! 

Kveð í bili.

xxx

brynja-g

Baby Bee - Undrakrem

Ég á lítinn gutta sem hefur alla tíð verið með frekar viðkvæma húð. Hann á það til að vera með barnaexem og getur orðið mjög slæmur. Það var þó meira þegar hann var yngri og virðist ekki koma eins oft núna, sem betur fer. Hann er samt sem áður mjög oft með einhverja þurrkubletti á útlimunum og húðin grófari viðkomu en hún ætti að vera. 

Ég hef í gegnum tíðina prufað hin ýmsu krem. Fyrst notaði ég alltaf Barnakremið frá Gamla Apótekinu, það var mjög fínt krem en náði samt aldrei að halda honum alveg góðum. Seinna hef ég prufað krem frá Neautral, Kókosolíu, Locobase og fullt af öðrum kremum. Það kemur fyrir að ég þurfi að nota sterakrem á exemið þegar hann er sem verstur en ég vil að sjálfsgöðu halda því í algjöru lágmarki. Enda kemur það ekki oft fyrir.

Um daginn las ég blogg hjá Ásu Regins þar sem að hún talaði svo vel um kremið úr barnalínunni hjá Burt's Bee's, Baby Bee. Ég var á Íslandi fyrir viku síðan og gerði mér ferð í Lyf og Heilsu og keypti eitt svoleiðis krem. 

Drengurinn er allt annar!! 

Ég hefði aldrei trúað því hvað eitt krem getur gert fyrir húðina á honum. Ég hafði eiginlega gefist upp og hugsaði með mér að svona væri bara húðin á honum og lítið hægt að gera í því. En þetta krem er algjört undrakrem og húðin á honum er orðin miklu mýkri en hún var, svei mér þá ég held að hún hafi bara ekki verið svona mjúk síðan hann var pínulítill. Ég ber kremið á allan kroppin hans eftir bað.

 Ég mæli allavega 100% með þessu kremi og hvet ykkur sem eigið börn með viðkvæma húð að fjárfesta í einni svona túpu.

xxx

brynja-g

Heimsóknir heimsóknir!

Síðustu dagar hafa heldur betur verið skemmtilegir!

Við erum búin að vera svo heppin að fá tvær heimsóknir á stuttum tíma og nutum þess í botn. Fyrst fengum við Tómas og Sari til okkar og nutum þess að hafa þau hjá okkur. Þau voru reyndar svo óheppin að vera svolítið lasin þessa daga en við reyndum nú samt að skemmta okkur vel. Auður vinkona var svo yndisleg að koma og passa tvíburana svo að foreldrarnir gætu farið út að borða með vinunum. Ferðinni var heitið á Ljunggren, sem ég hef nú talað um áður og vorum við að sjálfsögðu ekki svikin það kvöldið.

Þegar við vorum búin að kveðja hjónaleysin tók við önnur heimsókn. 

Elskulega mágkona mín hún Harpa kom með fallega litla frænda minn hann Guðmund. Ég get eiginlega ekki lýst því hvað mér fannst ótrúlega gott (og gaman) að hafa þau.

Guðmundur er náttúrulega afburðar fallegt og skemmtilegt barn og reyndi ég að knúsa hann eins vel og ég gat á meðan dvölinni stóð.

Að þessu sinni var það reyndar ég sem var óheppin og nældi mér í flensu á meðan þau voru hjá okkur. En ég lét það ekki stoppa mig og dró þau með mér út um allan Stokkhólm, vel dópuð að verkjalyfjum.

Ómetanlegar stundir

Þau fóru heim í gær og er ég búin að slaka vel á síðan. Börnin urðu svo líka veik í gær svo að þetta er algjört pestabæli þessa dagana. 

Billi tók sér frí í dag til þess að huga að veika fólkinu sínu, það var voðalega gott.

Annars er nú ekki mikið framundan í augnablikinu annað en lærdómur. Mig langar reyndar að fara á sýningu á Fotografiska safninu hérna í Stokkhólmi með honum David LaChapelle. Hann gerir myndir af frægu fólki þar sem það er sett í óraunverulegar aðstæður og eiga myndirnar til að vera svolítið ögrandi. Þær eru öðruvísi og skemmtilegar!

BJÖRK

Sýningin stendur til 3.mars svo að ég ætti nú að geta komið því að að líta við.

Við Harpa ætluðum einmitt á þá sýningu sl. miðvikudag en það fór út um þúfur þegar ég villtist í miðbæ Stokkhólms á bílnum!

(Nei ég er ekki með GPS í bílnum)

Það er fínt að geta keyrt stærri vegi eftir Google maps á i-phone og sjá svona gróft hvernig leiðin liggur en þegar kemur að því að treysta á það alveg downtown, mæli ég ekki með því. Þetta var orðið ansi skrautlegt á tímabili hjá okkur. 

Eigið góða helgi!

xxx

brynja-g

Bóndadagur

Til hamingju með daginn kæru bændur!

Ég hef ég nú þegar samið lítið ljóð handa mínum stóra "bónda". Þið sem þekkið mig vel vitið að mér hefur alltaf fundist einstaklega skemmtilegt að yrkja ljóð og semja sögur. Því var tilvalið að semja eitt í tilfeni dagsins. Svo er aldrei að vita hvað fleira dagurinn býður upp á fyrir hann.

 Litli "bóndinn" minn fær auðvitað eitthvað dekur líka frá mömmu.

Bóndarnir mínir tveir.

Ég hvet ykkur til þess að dekra aðeins við ykkar bónda, það er svo gaman að gera eitthvað fallegt fyrir þá sem manni þykir vænt um.

xxx

brynja-g

Þessa dagana.

Ég er yfir mig ástfangin af stígvélunum sem ég fékk frá Billa í jólagjöf. Mig er búið að langa í Billi Bi stígvél í mörg ár og loksins varð draumurinn að veruleika. 

Hann valdi ótrúlega falleg og klassísk stígvél með hjálp bestu vinkonu minnar, Elísabetar. Þau eru góð saman þegar kemur að því að velja eitthvað fyrir mig, reyndar eru þau alltaf góð saman. Nóg um það! Hann keypti þau í GS skóm í Kringlunni og ég gæti ekki verið ánægðari með þau. Nú hlakka ég bara til þegar snjórinn fer að minnka hérna hjá okkur svo að ég geti farið að nota þau. Ég tími þeim ekki út í snjóinn, þau eru of falleg. Svört leðurstígvél með spennu á ökklanum og efst á kálfanum.

Þau sjást kannski ekki mjög vel á þessari mynd, en nóg samt.

Annars á ég nú ekki von á að snjórinn fari að hverfa, í augnablikinu er hitastigið í kringum -15 gráðurnar. Það er ótrúlega gaman að fá að upplifa alvöru árstíðir. Ekki bara haust/vor allan ársins hring eins og á Íslandinu góða. Hérna er veturinn annað og meira en bara slabb og sumarið oft eins og Mallorca veður. 

Þessa dagana á námið mitt hug minn allan. Ég er í svo ótrúlega skemmtilegum áföngum þessa önnina. Uppáhalds áfanginn minn hingað til er Þroskasálfræði, bæði barna og fullorðinna. Þar sem að ég hef unnið mikið á hjúkrunarheimilum finnst mér mjög áhugavert að læra um þroska fullorðinna og þegar við færumst á okkar eldri ár. Það er merkilegt að skilja hvernig okkur hrörnar og hvað hægt er að gera til þess að hægja á því ferli að einhverju leyti.

Í gær var ég hins vegar að hlusta á fyrirlestur um málþroska barna og það var mjög áhugavert. Kennarinn fór aðeins inn á tvítyngi barna og það fannst mér sérstaklega áhugavert þar sem að ég er að fylgjast með mínum börnum í þeim sporum. 

Kannski maður leggi bara barna-og þroskasálfræði fyrir sig, hver veit!

Læt eina mynd fylgja með af tvíbökunum mínum. Hún var tekin áður en þau fóru í afmæli sl. sunnudag. Ég elska þau endalaust.

xxx

brynja-g

1 ár

Í dag höfum við búið í Stokkhólmi í eitt ár upp á dag. Mikið sem tíminn líður hratt. Fyrir ári var maður alveg grænn og vissi ekkert hvað var framundan. Þetta ár er búið að vera gríðarlega viðburðarríkt. Við höfum meðal annars keypt okkur hús og bíl, lært sænsku, kynnst ótrúlega skemmtilegu fólki og fullt fullt fleira. Það hefur líka verið erfitt, ég ætla ekki að ljúga því. Það tekur ótrúlega á að flytja í nýtt land þar sem maður hefur ekki fjölskylduna hjá sér og þekkir ekki inn á neitt. En sem betur fer er aðlögunarhæfni mannsins alveg hreint ótrúleg, fyrir utan það hvað það hefur hjálpað að eiga góða vini að hér úti! Það skiptir rosalega miklu máli. Annars tel ég að það styrki fjölskylduna mikið að flytja svona út saman og vera ein á báti. Það gerði það allavega í okkar tilfelli.

Það sem ég er þó mest ánægð með er hversu vel það hefur gengið með kakkana hérna úti. Þau eru alveg mögnuð. Þau tala sænsku og íslensku í bland, skipta á milli eins og ekkert sé. Þau hafa þurft að aðlagast tveimur leikskólum og staðið í flutningum tvisvar, einu sinni út og einu sinni hér innanlands. Þetta hefur allt gengið svo vel og ég er ekkert smá þakklát fyrir það. Að eiga tvö heilbrigð börn sem standa sig svona vel í öllu sem þau gera eru algjör forréttindi. Jájá, væmnin alveg að fara með mig. En það má líka stundum!

Þessa dagana er ákveðið þema hérna á heimilinu. Það er "Cars og Söngvaborg" þema. 

Krakkarnir vilja helst bara horfa á þetta tvennt, ásamt Ávaxtakörfunni. Ef ég segi eins og er þá finnst mér mjög skemmtilegt að horfa á þetta allt saman, enda er maður farinn að kunna myndirnar utan að. Kári Snær biður helst um Cars og Bryndis Kara um Söngvaborg. Hann er alveg sérlegur áhugamaður um bíla, vörubíla, gröfur og allt sem viðkemur bílum. Hann hefur reyndar rosalega gaman að því að syngja líka og er syngjandi allan daginn, það er mjög sætt. Hún hefur mikinn áhuga á söng og dansi og dansar með Söngvaborg eins og hún hafi ekki gert annað. Ég er viss um að hún verður einhver ballerína eða dansmær einn daginn. Hann hins vegar hefur gríðarlega skotkraft bæði á höndum og fótum svo að það er mjög líklegt að hann fari í boltaíþrótt. Annars mega þau að sjálfsögðu bara ráða því sjálf!

Það er svolítið fyndið að fylgjast með kynjamuninum frá upphafi. Þau fá eins uppeldi en eru samt svo ólík á þennan hátt. Hann er algjör gaur og hún algjör stelpa. Það er samt svo skemmtilegt, að fá að upplifa hvoru tveggja.

Eigið súper gott miðvikudagskvöld. Mínu verður eytt í lærdóm og skype.

xxx

brynja-g